Archive

Archive for the ‘Uncategorized’ Category

الحدا

June 22, 2010 4 comments



تعو نحكي شوي عن العلاقات… صرلي فترة بشوف هون وهونيك بكتير مدونات حكي عن العلاقات، وعن كيف البنت اللبنانية صايرة ، ول شباب كمان. حديث عن المصاري ول مظاهر واخر موبايل وأجدد قميص …. وسوشي (هيك شي يعني).

طيب، أنا عندي شي قولو بهيدا الموضوع؛
تنبلش من الاخر المصاري شي مهم، وشي أساسي وخلصنا من هل موضوع… بس الفكرة ما بتوقف هون… هي ولا حتى بتبلش هون…

في عالم إن كان شاب أو بنت بس بدن العريس أو العروس وهون بكون المصاري ول سيارة ول موبايل وشو رأي امي ول بست-فرند تبعي في… شي كتير أساسي…
بس في عالم(و موجودين وبكترة كمان) بدا هيدا الحدا لمتل ما بقولو بعبي الراس،ول مطرح ل هو في (ما قصدي إنو هو كتير ناصح) … إنو تخيلو، إن كان شب أو بنت، حدا فيك تحكي معو من دون ما تخاف على أفكارك أو من أفكارو… تحس حالك فيك تقول كل شي، أو على قليله مش غلط إذا صار وجربت تقول…
حدا بخليك تحس إنو يمكن كوبرنيكوس كان مغلط، وإنو إيه العالم بيبرم حولكم انتو بس تكونو سوا… وإنو معلش إذا ما كان كل شي ماشي على خطة إنت (بالكسرة) أو إنت (بالفتحة) مقررينا من زمان(من قبل ما يغلى البنزين).
حدا ما كتير بيفرق عليك إذا كان في كتير عالم أو كنتو لحالكٌ… حدا ما بكسّر وبخزق فيك تيبين إنو يابا أنا منيّك، أو إنو أنا “ربّا”… حدا بيعرف إنو إنت مش لالو أو لئلا ، ومنو عامل وكالة غير قابلة للعزل عليكي وعلى كل شي بيجي معك أو بيطلع منك (وهيدا الحكي كمان لل مذكر ، تذكير يعني مش أكتر… بما إنو كل شي متبادل) ..
وبعد في كتير قصص عن هيدا الحدا…

بس المهم إنو ، إذا صار ونوجد هيدا الحدا… نوجد بشكل عام مش إنو تواجدتو سوا… في كل العوامل الخارجية يلي راح نشوفا قبل ما عنجد نشوفو… لهني : السيارة، ول موبايل ول شكل ول ضحكة ول قميص ول لهجة و… و… و.
وفي كتير اشيا رح نسمعا قبل ما عنجد نسمعو… وهون هيدا الحدا ببين متل الكل لقبلو (يللي ما نجحو بفحص : “إنت الحدا”) ومنبلش نقول، إنو عنجد بدنا نجرب ؟؟ عنجد بدنا نلعب ريسك؟؟ ومنفوت بدوامة إنو معقول صرنا نحن عم منبش علعريس (أو العروس) ؟؟

بخصوص لكان بدي قولو … إنو مش البنت اللبنانية مدري كيف صايرة أو الشب يعني … العالم بعدو هو هو .. الفرق الوحيد هو إنو العوامل الخارجية عم تزيد، وعم بصير إلى أهمية أكتر وأكتر، لأنو نحنا صرنا نشوف يللي بوجنا كتلة قصص بتنشك بالكهربا (بس ما تكون مقطوعة) وغراض واكسسوار … فطبيعي نصير ننعد من هول ل عم بنبشوا علعريس (أو العروس)… أو يمكن بس عل غراض


Categories: Uncategorized

بيروت بالعربي

June 21, 2010 1 comment

يمكن أحلى بيروت هي يلي بالعربي…



Categories: Uncategorized

حب يا حب

June 21, 2010 1 comment

ب 26 حزيران بدنا ندون بالعربي… يمكن شي صعب لأنو تعودنا نكتب بكل شي إلا بالعربي…. ما عندي شي إكتب عنو هلأ، بس رح اكتفي بكم صورة كتبتن بالخط الثلثي…

Categories: Uncategorized